دوای گفتوگۆی چڕ و پڕ و، دانوساندن و مشتومڕی دوورودرێژی كوتلەكانی نێو پارلەمانی عێراقی و لە كەشوهەوایەكی سیاسیی پڕ لە قەیراندا یاسای هەڵبژاردن بە بێ ئەوەی لە لایەن جێگری سەرۆككۆمار (تاریق هاشمی)ـیەوە ڤیتۆ بكرێت، تێپەڕێندرا. نوێنەر و وتەبێژی لیستەكان ئەوەیان نەشاردەوە كە بۆ كۆتاییهاتن بەو قەیرانە، لایەنە بیانییەكان بە تایبەت ئەمەریكا و نەتەوە یەكگرتووەكان گوشارێكی زۆریان بۆ كوتلەكانی نێو پەرلەمانی عێراقی هێناوە. جگە لەوەیش مەترسیی دووبارە ڤیتۆكردنەوەی یاساكە لە لایەن هاشمی و، دەرئەنجامە خەراپەكانی بۆ سەر پڕۆسەی عێراق هانی هەموو لایەكی دەدا كە هەر چۆنێك بێت یاساكە پەسەند بكرێت.
لە ڕاستیدا ئەوی لە دواساتەكانی شەوی یەكشەمەی ڕابردوو لە ئەنجوومەنی نوێنەرانی عێراقدا ڕوویدا دەكرێ بە جۆرێك سازشی نێوان كوتلە سیاسییەكانی پارلەمان و چارەسەرێكی مامناوەندی و زیندووهێشتنەوەی پڕەنسیپی تەوافوق و نە زەرەر و نە قازانجكردنی لایەنە سیاسییەكانی نێو گۆڕەپانی سیاسیی عێراق لێك بدرێتەوە. چونكە جگە لەوە بریتیكی دیكە بۆ چارەی ئەو قەیرانە و ڕازیكردنی گشت لایەكان و پەكنەخستنی پڕۆسەی سیاسیی عێراق لە ئارادا نییە. لێرەدا ئەوەی گرنگە دواڕۆژی ڕۆڵ و پێگەی سیاسیی كورد لە عێراق و ژمارەی ئەو كورسیانەیە كە لە ئەنجوومەنی داهاتووی نوێنەرانی عێراق بەر كوردستانیان دەكەوێت و، لەو بارەیەوە نیگەرانییەكانی خەڵك و سەركردایەتیی سیاسیی كوردستانیش لە جێی خۆیەتی.
بە درێژایی قەیرانی یاسای هەڵبژاردن، هاوپەیمانیی كوردستان داوای پێداچوونەوەی بە دابەشكردنی ژمارەی ئەو كورسییانە دەكرد كە بۆ پارێزگاكانی عێراق داندرابوو و پشكێكی عادیلانەشی بۆ هەرێمی كوردستان دەویست و وای بۆ دەچوو كە دەبێ ژمارەی كورسییەكانی هەرێم لە پارلەمانی داهاتوودا 48 كورسی بێت. بەڵام دواجار ڕەزامەندیی لە سەر ئەو پێشنیازە نیشاندا كە تێیدا 2 هەتا سێ كورسی لە پشكی قەرەبوودا بۆ هەرێمی كوردستانە و لە ئەنجامدا پشكی سێ پارێزگاكەی هەرێم 43 یان 44 كورسی دەبێ. بە پێی لێدوانی پارلەمانتارە كوردەكان ئەمەریكا و نەتەوە یەكگرتووەكان گەرەنتییەكی تەواویان بە لایەنی كوردی داوە كە ئەو پشكەی هەرێمی كوردستان لە كورسییە قەرەبووەكاندا پارێزراو دەبێت. لە لایەكی دیكەیشەوە ئەگەر هاتبا و لایەنەكان دەستبەرداری سەقفی داواكارییەكانیان نەبانە و یاساكە دووبارە ڤیتۆ كرابا، دەبوایە دەنگی 165 نوێنەری پارلەمان بۆ ڤیتۆكردنی ڤیتۆكەی هاشمی مسۆگەر كرابا و ئەو كارەیش لەو باروودۆخەدا زەحمەت بوو و ئەو جۆرە مامەڵەكردنەیش لە گەڵ كێشە سیاسییەكان بە مانای نەمانی سیستەمی تەوافوقییە كە بۆ بەرژەوەندییەكانی كورد لە داهاتوودا زیانی دەبێ.
بە حیسابكردنی ژمارەی ئەو كورسیانەی كە لیستی كوردستانی لە ناوچەدابڕاوەكانی كوردستان بە دەستی دەهێنێ ڕەنگە ڕێژەی كورسییەكانی كوردستانیان لە پەرلەمانی داهاتوو 20 هەتا 21%ـی كورسییەكانی پارلەمانی عێراق بێت و ئەوەیش ئەو مانایە دەگەێنێت كە پێگە و دەستڕۆیشتوویی كورد لە ڕووی ژمارەی نوێنەرەكانی هەروەك خۆی دەمێنێتەوە و گۆڕانی بە سەردا ناهێت و، ڕۆڵی كورد بە شێوازی كاركردن و بەستنی هاوپەیمانێتی و مانۆڕە سیاسییەكانی لە پارلەمانی داهاتوودا گرێدراوە.