پێوەندیی ستراتیژیی نێوان پارتیی دیموكراتی كوردستان و یەكێتیی نیشتمانیی كوردستان لەسەر ئەو بناغەیە دامەزراوە كە هەدووكیان وەكوو یەك تیم كار بكەن بۆ هەرچی زیاتر پەرەپێدانی ئەزموونی سیاسیی هەرێم و چەسپاندنی دەستكەوتەكانی گەلی كوردستان و پایەداركردنی حوكمڕانی و دیموكراسییەت و ئارامیی سیاسی و كۆمەڵایەتی و بەرەوڕووبوونەوەی پڕكێشییە عێراقی و ئیقلیمییەكان و پێشكەشكردنی خزمەتگوزاریی زیاتر بە خەڵك و ئاوەدانكردنەوەی وڵات و گەشەپێدانی ئابووری و كۆمەڵایەتی.
چەند ئاسەوار و كاریگەرییەكانی ئەو پێوەندییە لە بوارە جیاجیاكانی ژیانی خەڵكدا ڕەنگ بداتەوە، نیشانەی ئەوەیە كە ئاسۆیی و شاقوڵی هەرچی زیاترە گەشەی كردووە و تەشەنەی سەندووە.
ئەم پێوەندییە چەند دەورانێكی سەخت و جیددی بڕیوە و توانای مانەوە و پەرەپێدانی خۆی سەلماندووە و لەم دەورانەیشدا زۆرن ئەو كەناڵە سیاسیانەی دەتوانن گوزارشت لە ئاستی پەرەسەندووی ئەو پێوەندییە دروست و ستراتیژییە بكەن، بەڵام حكوومەتی هەرێم لە هەموو ئەو كەناڵانە بەرچاوتر و كاریگەرترە، چونكە حكوومەت ڕاستەوخۆ پێوەندیدارە بە بونیادی كۆمەڵگە و بە ژیان و گوزەران و بەرژەوەندی و پێویستییەكانی خەڵكەوە.
كە كۆتایی بە ماوەی یاسایی كابینەی پێنجەم هات و كاك (نێچیرڤان بارزانی) دەوروتەسلیمی لەگەڵ دكتۆر (بەرهەم ئەحمەد ساڵح)ـدا كرد، هەموومان ئەو حەقیقەتەمان دەزانی كە بەردەوامێتی لە مانا و جێبەجێكردندا بۆ كابینەی شەشەمی حكوومەتی هەرێم، پڕشنگدارترین بەڵگەی گوزارشتی دروستانەیە لەو پێوەندییە ستراتیژییەدا. بۆیە ئێستا كە دكتۆر (بەرهەم) وەكوو سەرۆكی حكوومەتی هەرێم لە بۆنە جیاجیاكاندا ئەو بەردەوامێتییە دووپات دەكاتەوە و هەمیشە ئەوە دەڵێتەوە كە خۆی و كابینەكەی هاتوون زیادە بخەنە سەر ئەو تەلاری دەستكەوتانە كە كابینەی پێنجەم بە سەرۆكایەتیی كاك (نێچیرڤان) بینای كردووە، جگە لەوەی ڕۆحی بەردەوامێتی بە ئەزموونی حوكمڕانی دەدات، هەروەها ئاستی پەرەسەندووی پێوەندیی ستراتیژیی نێوان پارتیی دیموكراتی كوردستان و یەكێتیی نیشتمانی وێنا دەكاتەوە.
كاتێك كە دكتۆر (بەرهەم) پڕۆژە خزمەتگوزارییەكان دەكاتەوە و ئێمە دەزانین ئەم دەستپێكە سەركەوتوو و باشانە بەشێكن لە بەردەوامێتیی خودی ئەم پڕۆژانە كە لە سەردەمی كابینەی پێنجەمدا بیرۆكەیان هاتووەتە ئاراوە و بەرنامە و نەخشەڕێیان بۆ داڕێژراوە و تەنانەت خەرجییشیان بۆ دابین كراوە، ئەوسا دەزانین سەرۆكی حكوومەتی هەرێم زمانحاڵێكی مژدەبەخشی پێوەندیی توندوتۆڵی نێوان پارتیی دیموكراتی كوردستان و یەكێتیی نیشتمانیی كوردستانە. جا ئەوسا جگە لەوەی ئێمە شاگەشكە دەبین و متمانەمان بە ئاییندەمان بەهێزتر دەبێ و خەڵكیش بەرچاوڕۆشنتر و دڵنیاتر دەبن، هەروەها نەیارانیشمان هەزارویەك حیساب دەكەن بەر لەوەی قسەی نابەجێ لە بارەی ئەو پێوەندییەوە بكەن.