هاوسەرگیریی ڕاستەقینە یەكگرتن و ئاوێتەبوونی دوو كەسە كە هەریەكەیان تامەزرۆی ئەوی ترە، نەك تەنیا لە لایەنی سێكسەوە، بەڵكو لە هەموو لایەنەكانی دیكەوە، هەردووكیان بە تاسەوەن كە لەژێر یەك چەتردا ژیان گۆزەر بكەن، هەریەكەیان هەست دەكات كە لە لایەنی سۆز و هزر و جەستەییەوە وەك یەك پێویستی بەوی ترە، هاوسەرگیری پێویستبوونی دوو دڵ و دوو جەستە و دوو عەقڵە بە یەكتر. كەواتە هاوسەرگیری هاوبەندییەكی پیرۆزە كە دەبێتە مایەی یەكگرتنێكی تەواو لە نێوان دوو كەس و بنیاتنانی خێزان. بۆیە باسكردن لە ژیانی هاوسەرەتی باسكردنە لە ئاڵۆزترین و پڕنهێنیترین پێوەندی لە ژیانی بەشەریەتدا، بەپێی ژمارەی مرۆڤەكانیش سروشتی پێوەندیی جیاوازمان دێتە بەرچاو، ئەگەر چی هەر كۆمەڵێك چەند خاڵێكی هاوبەشیان هەیە، لێ هەر تاكێكیش لە چوارچێوەی كۆمەڵەیەكدا بە تێڕامان لە ژیانی هاوسەرگیری مێتودی تایبەتیی خۆی هەیە.
یەكیك لەو خاڵانەی كە هەردەم ئازاری دەروونی ئافرەتان دەدات كە چەندەها ساڵە پێڕۆ دەكرێت پرسی فرەژنییە، مێژوو دەگێڕێتەوە كە فرەژنی جگە لەوەی لەلایەن ئایینە ئاسمانییەكان رێگەی پێ درابوو، بەڵام زیاتر بە هۆی ئەو جەنگانە سەریهەڵدا كە بە سەدان پیاو دەكوژرا و ژمارەیەكی بەرچاوی ئافرەتانیش بە هۆیەوە بێوەژن دەبوون و سەرەنجام نەیاندەتوانی بژێویی رۆژانەی منداڵەكانیان پەیدا بكەن بۆ ئەوەی فەساد لە نێو كۆمەڵگە بڵاو نەبێتەوە، ناچار پیاوەكان ئەو ژنانەیان مارە دەكرد. ڕاستە ئایینی ئیسلام ڕێگەی بە پیاو داوە كە چوار ژن بهێنیت و یاسایش لەژێر ڕۆشنایی شەریعەتی ئیسلام داڕیژراوە و بە هەمان شێوە رێگەی بە پیاو داوە زیاتر لە ژنێك بهێنێت، بەڵام بۆ دەبێت تاوەكو ئێستا كۆمەڵگەی نێرسالاری بیری لەوە نەكردبێتەوە كە ئیتر واز لە نەریتە باوەكان بهێنێت و دەرگایەكی رۆشن بە ڕووی ئافرەتاندا بكاتەوە و چیتر لەژێر هیچ ناوێكدا نەچەوسێندرێتەوە كە هەموو كات زەرەمەندی یەكەم ئافرەتەكەیە وەك چۆن هەندێك جار منداڵی زۆری لەو پیاوە هەیە و نایەوێت منداڵەكانی بە جێ بهێڵێت و سەرگەردانیان بكات و لە پێناویاندا ژیانی خۆی دەخاتە دۆزەخەوە.
پیاو هەردەم هێنانی ژنی دووەم بۆ چەند هۆكارێك دەگەڕێنێتەوە، دەڵیت ژنەكەم منداڵی نابێت یاخود كەمتەرخەمە لە خزمەتكردنی و بەپێی پێویست هەڵسوكەوتی لەگەڵدا ناكات. نكۆڵی ناكەم كە هەندێك جار پیاو حەقی بێت بە هۆی نەبوونی منداڵ ژنی دووەم بهێنێت، بەڵام پێویستە بە رەزامەندیی ژنی یەكەم بێت، ئێمەیش بیستوومانە زۆر جار ئافرەتەكە خۆی داوای لە مێردەكەی كردووە ژنێكی دیكە بهێنێت و تەنانەت بۆیشی داوا كردووە. بەڵام كاتێك ئافرەت هیچ گرفتێكی نەبێت، بۆ پیاو بیر لە هێنانی ژنی دووەم بكاتەوە؟ هەموومان ئەوە دەزانین كە ئێستا دیاردەی فرەژنی سەرتاپای كۆمەڵگەی جیهانی سێی داگیر كردووە و بوونی بڕیارێكی رێگرتن لێرە یا لەوێ هیچ لە واقیعەكە ناگۆڕێ، بگرە لە هەندێ كاتدا بارەكەی زیاتر تێك داوە، لێرەیش پاش ئەو بڕیارەی كە دادگا مارەی ژنی دووەم نەبڕێ و سزای پیاو بدرێ بە زیندانی و پارە لێ سەندن، جارێكی تر مامۆستایانی بەڕێزی ئایینی لای خۆیانەوە مارەیی ژنی دووەم دەبڕن، بۆیە پێویستە ئەم خاڵە زۆر بە جیددی لە لایەن لایەنە پێوەندیدارەكانەوە لە بەرچاو بگیرێت. لە راستیدا جێگەی دڵگرانی بوو كە پەرلەمانی كوردستان بڕیاری لەسەر هەڵوەشاندنەوەی فرەژنی نەدا و هێشتییەوە. هیوادارم رێكخراوەكانی ئافرەتان واز لەو دۆسیەیە نەهێنن و جارێكی دیكە رەوانەی پەرلەمانی بكەنەوە، ئەگەر هیچ نەبێت گۆڕانكاری بكرێت تاوەكو ئافرەتان هەست بە دڵنیای بكەن.